ڕوانگە - دوای تێپەڕبونی 37 ساڵ بەسەر کیمیاباران کردنی گوندی زەردە لە داڵاهۆ، سەر بە پارزگای کرماشان، لە لایەن ڕێژێمی بەعسەوە، تائێستا بەهیچ شێوەیەک قەرەبووی مادی و مەعنەوی دانیشتوانی ئەو گوندە نەکراوەتە.

عەدالەت عومەر، نووسەر و لێکۆڵەری بواری جینۆساید بۆ ڕوانگە، ڕایگەیاند:"رۆژی 22ی تەمووز 37مین ساڵیادی کیمیابارانی گوندی زەردە لە داڵاهۆ - کرماشان بوو.. بە پێی رۆژ ژمێری کیمیاباران لە ئەرشیفی نەتەوەیی جینۆسایدی گەلی کوردستان  37 مین ساڵیادی کیمیابارانی ( گوندی زەردە )ی سەر بە شاری داڵاهۆ لە  پارێزگای کرماشانە.

وتیشی:" فروکە جەنگیەکانی دەوڵەتی عێراق لە سەردەمی رژێمی بەعس لە کاتی شەری نێوان عێراق و ئێران  لە 31ی پووشپەری 2688  کە دەکاتە 1988/7/22  گوندی زردەی سەربە شاری داڵاهۆ بۆمبارانی کیمیایی کرد، کە هەر لە یەکەم ساتی کیمیاباران دەستبەجێ 275 کەس شەهید  و نزیکەی 1100 کەسیش بریندار و ژەهراوی بوون و تاکو ئێستا ژمارە قوربانیان گەیشتوتە 320 کەس."

عەدالەت عومەر ڕونیشیکردەوە:"بەپێی زانیارییەکان یەکێک لە بۆمبە کیمیاییەکان کەوتبوو ناو  کانیاوی گوندی زردە کە سەرچاوی ئاوی گوندەکە بووە و لە کاتی کیمیابارانەکە ئەوەی لەو ئاوەیان خواردەبووە توشی خراپترین حاڵەت هاتن و زۆربەیان گیانیان لەدەستدا یان زۆر بەسەختی بریندار و ژەهراوی بوون، هەروەها ئاماژەی بەوەشکرد، لە سەردەمی شەڕی 8 ساڵەی نێوان ئێران و عێراقدا، زۆربەی  شار و گوندەکانی کوردستان لە لایەن ڕژێمی بەعسەوە کیمیاباران کران و گوندەکانی داڵاهۆش لەو تاوانە دەرنەچوون. جگە لە گوندی زرده، گوندەکانی «نسارو دیره» لە گەیلانی رۆژئاوا و بەشێک لە شارەکانی سەلاسی باباجانی و سەرپێلی زەهاو لە هەمان رۆژ  کیمیاباران کران.'

باسی لەوەشکرد:" سەبارەت بەبریندارانی چەکی کیمیایی، وەکو هەموو بریندارانی چەکی کیمیایی دوچاری دەیان نەخۆشی و گرفتی جۆراجۆر بوونەتەوە. لە وانەش هەناسە تەنگی و کۆکەی بەردەوام و نەخۆشی شێرپەنجەی خوێن و ڕیخۆڵە بوون و دیاردەی منداڵ لەبار چوون لە ناویان بەدی دەکرێت و تاکو ئێستا بێ چارەسەر ماونەتەوە و ساڵانێکی زۆرە بەدەست برینەکانیان دەناڵێنن تەنانەت بەشێکیان بیناییان لەدەست داوە.

عەدالەت عومەر، نووسەر و لێکۆڵەری بواری جینۆساید، ئاشکرایشیکرد:" بەداخەوە تاکو ئێستا ئەو کەیسە رووی هیچ دادگایەکی نەبینیوە کەسوکاری قوربانیان قەرەبووی مادی و مەعنەوی نەکراون و دادپەروەری رووی تێنەکردون و داواکارن کێشە و گرفتەکانیان چارەسەر بکرێت.'

شایەنی باسە گوندی زەردەی ناوچەی ڕێژاو بە زمانی کەڵهوری و هەورامی قسە دەکەن، مەزارگەی باوایادگار لەو گوندەیەو  بە شوێنێکی پیرۆزی یارسانەکان هەژمار دەکرێت