ڕوانگە - تۆ لە فەیسبووکەکەی خۆتەوە چەند وێنە و پۆستت بینی لەسەر مردنی فڵان هونەرمەند و نووسەر، خۆت و خەڵک لە دڵەوە چی دەڵێن؟
ئەمەش هەر قەرەباڵخییە، ئەمەش رێزگرتن و پێزانینە بۆ رەنج و بەرهەم و کارەکانی کۆچکردوو. کەناشتنەکەی قەرەباڵخ نییە یان پرسەکەی، ئەمە پێوەرێکی عەشایەریی و کۆمەڵایەتییە.
من پرسەی قەرەباڵخی وام بینیوە، مردووەکە یان کەسوکاری مردووەکە ئەسڵەن ئینسانی زۆر تاوانبار و خراپەکار و ئینسانکوژ خیانەتکاری نیشتمانیی بووە. ئایا دەکرێ قەرەباڵخییەکەی بکەینە پێوەر بۆ رێزگرتن لەو کەسایەتییە یان ڕێزگرتن لە کەسوکارەکەی؟
پێموایە زیادەڕۆیی زۆر دەکرێ لۆمەکردنی خەڵکی خۆمان سەبارەت بە چۆڵبوونی پرسەی فڵان کەس.
هونەرمەندەکان.. شاعیرەکان... نووسەرەکان... ئەمانە زۆرجار خۆیان بە دەستی خۆیان دنیاکەیان بچووک دەکەنەوەو درزێکی گەورە ئەخەنە نێوان خۆیان و هەوادارەکانیانەوە. ئیتر بە گۆڕینی هەڵوێستێکبێ یان خۆبەستنەوەیان بە حزبێکەوە
ئەگەر ڕاستگۆ و پابەندبووبێ، ئەوا تۆ و هەزارانی وەک تۆ ناتوانن نادیدەی بگرن و بۆ مردن و ژیانەکەی رێزێکی زۆر دانەنێن.
لێرەدا مەبەستم تەنیا کەسێک نییە کە دەمرێ، بەڵکو مردنی ئەوانەی دوێنێ و پێرێ مردن و ئەوانەیشی ئەمڕۆ و سبەینێ دەمرن.
