ڕوانگە - پسپۆڕێکی بواری ئابوری ڕایدەگەیەنێت:" عێراق بە فەرمی كەوتووەتە ناو بازنەی ئامانجەكان لە چوارچێوەی ستراتیژی سزا سەپێنراوەکانی ئەمریکا بەسەر ئێراندا و ئەگەر كۆنگرێسی ئەمریكا ئەو پرۆژە یاسایە پەسەند بكات كە ئامانجی قەدەغەکردنی هاوردەکردنی غازو کارەبای ئێران بۆ عێراق، ئەوا عێراق (40%) توانای بەرهەمهێنانی كارەبا لە دەستدات، كە زیاتر لە (11) هەزار مێگاواتە.

نەبیل مەرسومی، پسپۆڕی بواری ئابوری، لە واڵی تایبەتی خۆی لە  تۆڕی كۆمەڵایەتی فەیسبوک، بابەتێکی بڵاوکردۆتەوە و ئاشکرایکردوو:" عێراق بە فەرمی كەوتووەتە ناو بازنەی ئامانجەكان لە چوارچێوەی ستراتیژی سزاسەپێنراوەکانی ئەمریکا بەسەر ئێراندا، بەگوێرەی یاسای "بێ وزەی ئێرانی" لەڕێگەی پڕۆژە یاسایەکی نوێ کە پێشکەشی کۆنگرێس کراوە، كە ئامانجی قەدەغەکردنی هاوردەکردنی غازو کارەبای ئێرانە لەلایەن عێراقەوە."
مەرسومی ئاماژەی بەوەشکردووە:" ئەم بڕیارە، ئەگەر چالاكبكرێت، لێكەوتەی مەترسیداری لەسەر ئابوری و کۆمەڵگای عێراق دەبێت، بەوپێیەی سیستەمی کارەبا (40%)ی توانای لەدەست دەدات، کە (8)هەزار مێگاواتی وێستگەكانی، غازی ئێران بەكاردەهێنن و زیاتر لە (3) هەزار مێگاوات كارەباش لە ئێرانەوە هاوردە دەکرێت.

كە بەم شێوەیە دابەش دەکرێت:
1- کارەبای هاوردەكراو لە ڕێگەی هێڵی ئێرانی (خانەقین-سەرپێل) گەیشتووەتە 927 هەزار و 392 مێگاوات.
2- کارەبای هاوردەكراو لە ڕێگەی هێڵی (خۆر زوبێر- خوڕەمشار) گەیشتووتە 263 هەزار و 816 مێگاوات.
3- کارەبای هاوردەكراو لە ڕێگەی هێڵی ئێرانی (دیالە-مێرسەد) گەیشتووەتە 1,630,703 مێگاوات.
4-هێڵی ئێرانی (عەمارە- کەرخە) 311 هەزار و 813 مێگاوات دابین دەكات.

مەرسومی ڕونیشیکردۆتەوە:"ئێران غاز بۆ عێراق هەناردە دەکات لە ڕێگەی بۆرییەکی 590 کیلۆمەتری لە ڕێگەی دوو هێڵەوە، یەکێکیان بەرەو بەغداد دەڕوات، ئەوی دیکەیان بەرەو شاری بەسرە دەڕوات، ئەو هێڵەی بەرەو بەغداد دەڕوات تیرەکەی 42 ئینجە و لە شاری سەلوییە تا شاری نەفت شەهر لەسەر سنوری ئێران و عێراق درێژ دەبێتەوە٫ وە درێژبوونەوەكەی لە ناو خاکی عێراقدا نزیکەی 120 کیلۆمەترە، بە پارێزگای دیالەدا تێدەپەڕێت، لەوێدا بەسەر سێ لقدا دابەش دەبێت ، غاز بۆ سێ وێستگەی کارەبا دابین دەکات: یەکێکیان لە دیالە و دوو وێستگەی لە بەغداد."

نەبیل مەرسومی، پسپۆڕی ئابوری باسی لەوەشکردووە:" لە سەرەتای ئەو گرێبەستەی کە لە بەغداد (تەمموزی ٢٠١٧) و بەسرە (حوزەیرانی ٢٠١٨) واژۆ کراوە، ئێران نزیکەی (٥٢) ملیار مەتر سێجا غازی بە بەهای (١٥) ملیار دۆلار هەناردەی عێراق کردووە."